Жаңалықтар

Қытайдың Duke Kunshan университеті елордалық оқушыға толық білім грантын ұсынды

Нұр-Сұлтан қаласындағы Назарбаев Зияткерлік мектебінің түлегі Наргиз Шантаева Қытайдың Duke Kunshan университетінен толық білім грантын ұтып алды. Сондай-ақ, Наргизге әлемдік QS-2021 рейтінгісі бойынша Еуропаның үздік саяси университеті саналатын Франциялық Sciences Po университетінен шақырту келді.
 
Жоғары оқу орындарын таңдау кезінде қытайлық университеттің ұстанған жаһандық көзқарасы мен этно-мәдени алуандылығы Наргиздің назарын аудара білген. Оған қоса, Duke Kunshan университеті (DKU) – Duke Университеті (АҚШ) мен Ухань университетінің (Қытай) бірлескен жобасы. DKU дипломынан басқа, барлық түлектер Duke университетінің дипломын ала алады. Зияткерлік мектеп түлегі Наргиз жоғары оқу орнында заңгер мамандығы бойынша білім алуды жоспарлап отыр.
 
– Осынау 6 жыл ішінде маған көрсеткен ықыласы мен көмегі үшін барлық ұстаздарым мен кураторларға ерекше алғыс айтқым келеді. Мектеп бітіруші сыныптастарыма келер болсақ, жаңа қадамдарыңызға гүл бітсін. Сіздерге тек сәттілік тілеймін!
 
Қазіргі уақытта мен университеттегі оқуыма дайындалып жатырмын. Содан кейін арманымдағы жұмысқа орналасып, сүйікті құқық және сот істерінде өзімді білікті маман ретінде дәлелдейтініме үміттенемін, – дейді жас зияткер.
 
Абайдың «Еңбек етсең ерінбей, тояды қарның тіленбей» деген қанатты сөзін өмірлік ұстанымы етіп алған жас түлекке тек сәттілік тілейміз.